Ինչպե՞ս խնամել ձեռքերի չոր մաշկը:
Ձեռքերի մաշկի չորության խնդրի առաջացումը կարող է տարբեր պատճառներ ունենալ: Այն կարող է մարդու կենսակերպի հետևանք կամ հիվանդության ախտանշան լինել: Ձեռքերի չոր մաշկը կարող է կապված լինել նաև շրջակա միջավայրի ագրեսիվ ազդեցության հետ, այդ իսկ պատճառով, նույնիսկ պատշաճ խնամքի դեպքում, բնորոշ է պարբերականությունն ու սեզոնային արտահայտվածությունը: Շատ չոր մաշկը ոչ միայն գեղագիտական առումով է խնդրահարույց, այլ նաև հանգեցնում է արտահայտված անհարմարության: Առաջանում է մաշկի մշտական ձգվածության զգացում,
իսկ ծալվող հատվածներում կարող են նաև ցավոտ ճաքեր առաջանալ: Տհաճ ախտանշանների վերացումը հնարավոր է միայն ճիշտ միջոցների օգտագործմամբ մշտական ու համալիր խնամքի միջոցով:
Առաջացման պատճառներն ու մեխանիզմները
Ձեռքի մաշկի չորություն առաջ բերող հիմնական գործոններն են արտաքին միջավայրի ագրեսիվ ազդեցությունները: Բարձր կամ ցածր ջերմաստիճանը, ուժեղ քամին, կիզիչ արևն այն գործոններն են, որոնք նպաստում են հիդրոլիպիդային շերտի ամբողջականության խախտմանը: Դրա հետևանքով ձեռքերի մաշկը դառնում է ջրազրկված ու պակաս առաձգական, ժամանակի ընթացքում կարող է առաջանալ նաև թեփ, ձգվածության զգացողություն ու նույնիսկ բորբոքում:
Մեկ այլ, ոչ պակաս կարևոր գործոն է մաքրող, լվացող և ախտահանիչ միջոցների մշտական ազդեցությունը: Այս շարքին են դասվում նաև կենցաղային միջոցներն ու այն նյութերը, որոնց հետ մարդը շփվում է աշխատանքի ընթացքում: Առավել հաճախ չորանում ու ճաքում է արդյունաբերական արտադրության ոլորտում աշխատող անձանց, բժշկական անձնակազմի կամ մաքրման ծառայություն տրամադրող անձանց ձեռքերի մաշկը: Զարգացման մեխանիզմն ուղղակիորեն կապված է քիմիական նյութերի ազդեցության հետևանքով վերնամաշկի մշտական վնասման հետ: Դրանց կազմում առկա ՄԱՆ-երը (Մակերևութային ակտիվ նյութերը) խախտում են մաշկի բնական պատնեշը, ինչն էլ թույլ է տալիս ջրին գոլորշիանալ մաշկի մակերևութային և խորը շերտերից:
Որոշ հիվանդություններ նույնպես կարող են հանգեցնել մաշկի չորության և կոշտության: Դրանցից են ուղղակիորեն մաշկաբորբերը (փսորիազ, ատոպիկ մաշկաբորբ, ալերգիկ մաշկաբորբ, մաշկի սնկային հիվանդություն) կամ մարսողական, էնդոկրին, նյարդային համակարգերի հիվանդությունները: Նրանք հանգեցնում են ճարպագեղձերի աշխատանքի խախտմանը և խոչընդոտում են սննդարար նյութերի ներծծմանը:
Հաճախ դաստակների չորությունն ու թեփոտումը կապված է հիպովիտամինոզի հետ, ինչն էլ առաջանում է սխալ սնունդի, չոր դիետաների, ալյուրից պատրաստված սնոնդի, քաղցրավենիքի, ալկոհոլի և սուրճի չարաշահման ֆոնի վրա: Վիտամինների պակասը հանգեցնում է օրգանիզմում և մաշկի մեջ նյութափոխանակության գործընթացների խախտմանը:
Որպեսզի հասկանաք, ինչպես խնամել ձեռքերը և ինչ անել, եթե ձեռքերի մաշկը թեփոտում և կոշտանում է, պետք է հասկանալ էպիդերմիսում կատարվող պաթոլոգիական գործընթացները: Հիպերկերատոզի զարգացման մեխանիզմը կապված է մի շարք գործոնների հետ:
- Մաշկի բնական պաշտպանիչ և պատնեշային հատկությունների խախտում:
- Արտաքին գործոնների մշտական ազդեցություն:
- Մաշկի սովորական բնութագրերի՝ տուրգորի, առաձգականության և ամրության խախտում:
- Էպիդերմիսի թարմացման գործընթացի խախտում և մեռած բջիջների հեռացում:
- Մաշկի սնուցման խախտում:
Այս բոլոր գործընթացները տարբեր չափով ազդում են խնդրի առաջացման հնարավորություն և դրանց արտահայտվածության չափի վրա, այդ իսկ պատճառով անհրաժեշտ է ձեռքերի չոր մաշկի համալիր խնամք:
Ճիշտ խնամք ու բուժում
Ձեռքերի չոր մաշկի խնամքը պետք է մշտական լինի: Նախ և առաջ պետք է բացառել կամ նվազագույնի հասցնել վնասվածքներ առաջացնող գործոնների ազդեցությունը: Քիմիական նյութերի օգտագործումից առաջ անհրաժեշտ է ձեռնոցներ հագնել, իսկ օգտագործումից հետո՝ ձեռքերը տաք ջրով մանրակրկտորեն լվանալ: Ձեռքերը հաճախակի լվանալը նպաստում է մաշկի չափազանց չորացմանը, այդ իսկ պատճառով ջրի հետ յուրաքանչյուր շփումից հետո խորհուրդ է տրվում խոնավեցնող նրբաքսուք օգտագործել:
Ցուրտ եղանակին փողոց դուրս գալուց առաջ անհրաժեշտ է պաշտպանիչ նրբաքսուք քսել և ձեռնոցներ հագնել:
Խորհուրդ է տրվում շաբաթական առնվազն մեկ անգամ ձեռքերի մաշկի խնամքի համալիր պրոցեդուրա իրականացնել: Դրանք ներառում են տաք վանաները, որոնց մեջ ավելացվում են եթերային յուղեր, սկրաբի կամ պիլինգի համար նախատեսված այլ միջոցների օգտագործումը, ձեռքերի համար նախատեսված բնական յուղային խառնուրդները, որոնք պարունակում են խոնավեցնող և սնուցող բաղադրիչներ: Սկրաբը քսում են թեթև, մերսող շարժումներով և 2-3 րոպե անց լվանում են տաք ջրով, դիմակները մաշկի վրա թողնում են մինչև ամբողջական ներծծումը կամ հրահանգի համաձայն լվանում են: Լիարժեք արդյունքի հասնելու համար խորհուրդ է տրվում դրանք քսել քնելուց առաջ:
Ձեռքերի չոր մաշկի խոնավեցման հիանալի միջոց է այնպիսի նրբաքսուքների օգտագործումը, որոնք պարունակում են վիտամիններ, բուսական յուղեր, ցերամիդներ, խոլեսթերիններ, ճարպաթթուներ և, որոնք ունեն խոնավեցնող և վերականգնող ազդեցություն:
Մաշկի խնամքը պետք է կանխարգելիչ ուղղվածություն ունենա, քանի որ արտաքին միջավայրի ագրեսիայից խուսափելն ավելի հեշտ է, քան դրա հետևանքները բուժելը: Նշված առաջադրանքը կարող է հաղթահարել Բեպանտեն Դերմա (Derma) ձեռքերի վերականգնող բալզամը: Վերջինիս բաղադրության մեջ առկա ակտիվ բաղադրիչները պաշտպանում են ձեռքերի նուրբ մաշկը վնասվածքներից և փափկեցնող և սնուցող ազդեցության շնորհիվ նպաստում են արագ վերականգնմանը: Բեպանտեն Դերման օգատգործվում է ձեռքերի մաշկի չորության կանխարգելման կամ վերացման ու մաշկի ընդհանուր վիճակի լավացման համար:
Բացի այդ ձեռքերի չորության զարգացման կանխարգելման համար անհարժեշտ է ուշադրություն դարձնել սննդակարգի և ջրային ռեժիմի վրա: Օրգանիզմում հեղուկի անբավարարության դեպքում խախտվում են վերնամաշկի ու բուն մաշկի ֆիզիոլոգիական գործընթացները, նվազում է հյուսվածքների առաձգականությունն ու տրուգորը: Սնունդը պետք է բազմազան լինի, այն պետք է ներառի օրգանիզմի համար կարևոր նյութեր՝ սպիտակուցներ, ճարպեր, ածխաջրեր, վիտամիններ և այլ սննդարար նյութեր: Շատ դժվար կլինի դրական արդյունքների հասնել առանց այս պարզ կանոններին հետևելու: